Neymar ya tsawaita kwantarinsa da PSG

Dan wasan Brazil da ke taka leda a PSG ya sanya hannu kan sabuwar yarjejeniya da kungiyar inda ya amince ya ci gaba da taka leda har zuwa 2025, kamar yadda PSG ta sanar.

A 2017 PSG ta ɗauko Neymar daga Barcelona kan makudan kudi yuro miliyan 222.

Neymar kuma ya lashe kofuna 9 a kungiyar tare da taimakawa kulub din zuwa wasan karshe na gasar cin kofin zakarun Turai a karon farko.

"Na girma na zama mutum anan, na zama cikakken dan kwallo kuma," ya fada a shafin kungiyar ta PSG.

Neymar yana cikin shekarar karshe a kwataraginsa, bayan sanya hannu kan kwantaragin shekara biyar tun farkon zuwansa.

Tun zuwansa PSG, dan wasan mai shekara 29 ya ci kwallo 85 a wasa 112, kuma ya bayar an ci kwallo 51.

Dan wasan ya fuskanci koma baya a 2019 daga magoya bayan kungiyar wadanda suka rika yi masa ihu, lokacin da ya nuna zai koma Barcelona.

Neymar 'ya fi farin ciki' a rayuwarsa ta PSG.